Agjencia gjermane për spiunazh do ta hetojë partinë opozitare “Alternativa për Gjermaninë” për të vërtetuar se a e kanë shkelur kushtetutën me politikat e tyre kundër imigrantëve.

Agjencia “BFV” e ka klasifikuar partinë kryesore opozitare të Gjermanisë si rast për t’u hetuar. Kështu ka thënë shefi i kësaj agjencie, Thomas Haldenwang. Kushtetuta gjermane përmban kufizime të rrepta kundër ekstremizmit, duke mundësuar mbikëqyrje të madhe të partive ekstreme.

Kjo masë ndërmerret mjaft rrallë, ndonëse agjencia ka hetuar edhe parti të tjera në të kaluarën. Partia “AfD” ishte bërë pjesë e parlamentit kombëtar në zgjedhjet e vitit 2017, duke fituar vota nga votuesit e partive kryesore përmes përqendrimit në shqetësimin e votuesve për imigrimin. Kjo parti ka përfaqësues edhe në të gjitha 16 parlamentet rajonale të Gjermanisë.

Haldenwang tha para gazetarëve në një konferencë të mbajtur në Berlin se ekzistojnë dyshimet fillestare se politikat e partisë “AfD” janë kundër rendit demokratik dhe kushtetues. Sidoqoftë, ai ka thënë se këto dyshime nuk janë ende të mjaftueshme për ta monitoruar partinë me metodën e spiunimit, shkruan “Reuters”, transmeton Gazeta Express.